كيف يمكن للوالدين الإجابة على سؤال ليش هيك بصير معنا

يستعرض هذا الفيديو كيف يمكن للوالدين الإجابة على سؤال ليش هيك بصير معنا مع الأخصائية هناء أبو عطية

هاد السؤال كتير حسّاس ولازم نكون كتير حريصين بالإجابة، من أهم النصائح الي لازم نتبعها بالإجابة:

أولا الصدق يعني بعطي الطفل معلومة حقيقية بدون ما أكذّب عليه لحتى أضل أنا مصدر المعلومات لابني. إذا كذبت على ابني وحاولت أجمّل الحقيقة وهو طلع سمعها من مصدر تاني هالشي رع يزعزع الثقة الي بيني وبينه ورح أبطل أنا المصدر الّي بيرجعله ليحصل على المعلومات.

تاني شي لازم أراعي عمر الطفل ومستوى إدراكه فنوعية المعلومات الي بعطيها لطفل عمره 4 أو 5 سنين مختلفة عن المعلومة الي بقدمها لطفل عمره 10 أو 11 سنة. حاولوا قدر المستطاع استخدام عبارات بسيطة وأمثلة سهل الطفل يفهمها وابتعدوا عن الغوص بالتفاصيل.

من النقاط المهمّة كتير تأكيد مشاعر الطفل والتركيز عليها والتأكيد إنو الي عم بصير مش بسببه. حتى لو هاد الشي بديهي إلنا نحنا الكبار بس كتير أطفال بيشعورا بالذنب أو بيحسّوا إنو هم عملوا شي غلط وهالشي الي عم بصير هو عقاب إلهم.

أعطوا الطفل أمل، حتى لو إنتو مش قادرين تشوفوه بس ضروري الطفل يحس إنو في شي منيح رح يصير لقدّام حتى لو كل المؤشرات الي حوالينا ما بتدل على هاد الأمل.

مع شباك أمل نسعى لفتح شبابيك من الأمل أمام جيل من الأطفال المتضررين من الحرب ومقدمي الرعاية من حولهم من عائلات ومقدمي برامج الدعم كي يستطيعوا التغلب على صدمتهم ومشاعر الخوف والرعب التي عاشوها ويتمكنوا من التطور والنمو بأفضل إمكاناتهم.

تابعوا المزيد من المحتوى على
https://www.amal.ps

شاركونا أفكاركم ورأيكم على البريد الإلكتروني
editor@habaybna.net